SEPFOPE Prepara Vaga Ba Timor-oan Servisu Iha Nova Zeladia

DÍLI-Sekretariadu Estadu Politika Formasaun Profesional Empregu (SEPFOPE), ba dau-daun ne’e prepara Timor-oan sira liu husi loke vaga ba publiku ne’ebe maka iha interasadu atu ba servisu iha Nova Zelandia iha area konstrusaun.

Preparasaun ne’e liu husi enkotru hamutuk entre Sekretariu Estadu Politika Formasaun Profesional Empregu (SEPFOPE), Ilidio Ximenes da Costa ho Stefan Corbett ne’ebe akompana husi Embaixador Nova Zelandia ba Timor Leste, Jonathan Schwass no Direitor Jeral SEPFOPE, Jacinto Barros Gusmão. Hafoin remata enkontru, Direitor Jeral SEPFOPE, Jacinto Barros Gusmão hatete, objetivu enkontru hamutuk Stefan Corbett ho embaixador Nova Zelandia ba Timor Leste, Jonathan Schwass atu follow up fali enkotru ne’ebe halao iha semana rua liu ba kotuk hodi prepara timor-oan sira atu haruka ba servisu iha Nova Zelandia iha area konstrusaun. “Ida ne’e ita tenki servisu hamutuk atu oinsa maka prepara ho diak, tanba atu ba iha ne’eba minimal timor-oan sira tenki iha konesementu ba lingua English diak, no tenki iha skill naton ba iha area konstrusaun,”nia dehan ba diariu ne’e iha Obrigado Barrack, Terça (11/03). 

Tuir nia katak, ba dau-daun ne’e mos SEPFOPE prepara ona ema hamutuk 600 hodi haruka ba servisu iha Australia iha area Hortikultura no mos Hospitalidade i seidauk prepara iha area konstrusaun ninian.   Ho ida ne’e nia dehan, SEPFOPE sei prepara kandidatu timor-oan sira atu ba servisu iha area konstrusaun nian, ne’ebe iha ne’eba sira (Nova Zelandia-red) fo durasaun tenpu fulan 3.  “Ida ne’e tenki hare didiak tanba ba iha ne’eba para aprende servisu konstrusaun nian liu-liu iha sauda no seguransa, nune’e sira fila  mai bele implementa mos esperensia ne’ebe sira hetan iha Nova Zelandia ninian,”nia esplika.

Numeru fiksu atu haruka timor-oan ba servisu iha Nova Zelandia, nia dehan, primeiru etapa sei koko uluk lai ho nain 2, tanba iha kompainia 2 maka prepara hela, maibe hanoin katak wainhira nain 2 ne’e ba servisu diak, entaun sei aumenta tan. Nia dehan, timor-oan sira ne’ebe atu ba servisu iha Nova Zelandia ne’e, SEPFOPE sei loke vaga ba ema sira ne’ebe maka iha esperensia konstrusaun.

“Ita mos sei servisu hamutuk ho kompainia sira, karik bele sira bele haruka sira nia ema ne’ebe hatene English diak, ita sei servisu hamutuk oinsa prepara kandidatu hodi haruka ba iha Nova Zeladia,”nia haktuir. Nue’e mos, Embaixador Nova  Zelandia ba Timor Leste, Jonathan Schwass hatete, Nova Zelandia iha komitmentu nafatin atu tulun governu Timor Leste liu husi haruka trabailador ba servisu iha Nova Zelandia.

“Ami prontu apoiu governu Timor Leste liu husi Sekretariu Estado Politika Formasaun Profesional Empregu (SEPFOPE) atu bele prepara timor-oan sira ba servisu iha Nova Zelandia,”nia promote.