DÍLI-Governu Korea do Soul liu husi KOICA apoiu orsamentu ho montante
hamutuk U$6 miloens ba Sekretariu Estado Peskas (SEP) hodi hari sentru
treinamentu peskas ne’ebe tuir planu sei realija iha tinan ne’e. Apoiu ne’e bazeia
ba proposta ne’ebe maka husi Sekretariu Estado Peskas (SEP), submete ba iha
KOICA no hetan duni aprovasaun husi governu Korea do Soul.
Ho apoiu ne’e, Sekretariu Estado
Peskas (SEP), labele dezenvolve mesak sentru treinamentu peskas ne’e rasik,
maibe presija servisu hamutuk ho lina ministerial hanesan Sekretariu Estado
Politika Formasaun Profesional Empregu (SEPFOPE), hodi bele dezenvolve hamutuk.
tan ne’e, iha loron Terça (11/03), Sekretariu Estado Politika Formasaun
Profesional Empregu (SEPFOPE), Ilidio Ximenes da Costa buka tuir Sekretariu
Estado Peskas (SEP), Rafael Gonçalves, hodi servisu hamutuk para bele estabelese
sentru treinamentu peskas nian ne’ebe sei realija iha tinan ne’e.
“Enkontru ho Sekretariu Estado Peskas
(SEP), maka atu halo kordenasaun ba prepasaun loke sentru treinamentu peskas
nian iha Distritu Liquiça,”SEPFOPE, Ilidio dehan ba jornalista sira hafoin remata
ekontru, iha Edifisiu MAP, Comoro.
Nia hatutan, estabelesementu sentru
treinamentu peskas, parte SEPFOPE nian maka halai liu ba formasaun no dezenu
kurikulum maibe ba fijikamente husi parte SEP nian. “Agora ekipa tekniku sira
komesa lao para hare ninia infrastrutura, formasaun iha area saida maka
importante hanesan budi daya ikan ka, maritima nian ka ou ema atu kaer ro, tan
ne’e Sekretariu Estado rua ne’e tur hamutuk para bele hare,”nia dehan.
Nune’e mos, Sekretariu Estado Peskas
(SEP), Rafael Gonçalves reforsa tan katak, estabelesementu sentru treinamentu
peskas nian tenki kolabora hamutuk ho SEPFOPE atu nune’e bele garantia ninia
kontinuidade ka nia sustentabilidade dezenvolvimentu ba future0
“Solusaun husi enkontru ne’e maka ita atu hasai espasu ida hodi forma ka
prepara fali komisaun ida hodi halo akompanamentu ba iha ninia prosesu tomak
ne’ebe atu hahu iha tinan 2014,”nia dehan.
Nia haktuir, estabelesementu sentru
treinamentu peskas nian ne’e rasik tuir planu sei hari iha Distritu Liquiça
tanba Distritu refere iha fasilidade kompletu. “Sei iha ekipa ida mai husi Korea
do Soul atu halo verifikasaun, halo dezena, nune’e bele hatene ninia prosesu
administrative nune’e ita asina nia agreement iha 2014 ita bele hatun ninia
prosesu tomak,”nia dehan.
Tuir nia katak, tipu formasaun ne’ebe
atu dezenvolve iha sentru treinamentu peskas maka hare ba iha penankapan ka
fishing, no aquicultura nian. “Ita koalia kona-ba penankapan ka fishing nian
ne’e, ne’e ita konsentra ba iha oinsa maka atu treina ita ninia peskador, joven,
ou ema ne’ebe interesadu atu bele lori ro, oinsa sira bele utilija parte de
peskas, oinsa hatene opera makina ro nian, no iha parte aquicultura nian maka
ita atu introdus ninia metodu-metodu atu hakiak ikan ne’ebe diak hodi garante
ninia kualidade no prosesamentu ba iha merkado,”nia esplika.
Nia dehan, formadores ne’ebe atu
hanorin iha sentru treinamentu peskas nian sei halo kombinasaun entre rai liu
ho rai laran. “Iha peskas ita mos iha ita nia ema balu ke preparadu no
esperensia servisu iha ro i sira bele prontu kapasita ita nia ema sira
ne’e,”nia katak.
Nia
dehan, orsamentu ne’ebe maka apoiu atu dezenvolve sentru treinamentu
peskas maka iha U$6 miloens bazeia ba proposta ne’ebe maka SEP deriji ba iha
KOICA no governu Korea do Soul aprova ona U$6 miloens, ne’ebe ninia durasaun
projeitu maka hahu iha tinan 2014 to’o 2017.
Tan ne’e nia dehan, SEPFOPE hanesan
parseiru ne’ebe maka besik liu ba iha SEP para bele servisu hamutuk hodi bele
halo jestaun diak ba iha sentru treinamentu peskas ne’e rasik.
Antes atu estabelese sentru
treinamentu peskas ne’e rasik, nia dehan, durante SEP fo ona formasaun maibe
iha skala kik nian no seidauk orienta ba iha semi industria no industria.
Sentru treinamentu peskas sei akomula
ema hira, nia dehan, sei hare ba programa SEPFOPE nian maizumenus trabailodr
ne’ebe maka ba servisu Korea do Soul iha area peskas tinan ida hira, bazeia ba
ida ne’e maka sei dezena ninia kapasitas, porezemplu tinan ida nia bele tampung
ema 100 ka 200.
Tuir nia katak, importansia husi
sentru treinamentu ne’e maka atu fasilita joven sira antes atu ba servisu iha
korea do soul ne’ebe maka hetan ona informasaun ne’ebe maka diak, atu
transforma faziadamentu peskador husi
skala ki’ik ba skala semi industria no industria, no sei fasilita funsioariu
sira atu ba tuir formasaun kultu prazu hodi dezenvolve sira nia kapasidade.
Tidak ada komentar:
Posting Komentar